[باللهجة الجزائرية] رمضان بلى القذافي مكانش منها

السلام عليكم , في هاد اليوم راح نحكيلكم أنا شخصيا عن يومياتي مع شهر رمضان , هاد المحاضرة ليراكم شايفينها على راديو زنقة زنقة , أنا راح نوصل بزاف أفكار لكل عبد كان إنسان و لا جماد حاجة متهمش إدا كان دركا راو يسمع فيا و لا راو راقد و مقدرش لرمضان مع أني و بكل صراحة ما حسيت بوالو , لا جوع و لهم يحزنون و أنا ليبديت نصوم قبل كل المومنين بسمانة , الكل ما سدقونيش بلي راني شوفت الهلال , الله غالب هاد الأومبيلونس ليفيها الهلال معندهاش الوقت باه توري روحا لقاع الناس , على العموم دركا معليا غير نبدا و نطلب من الناس ليرام يشوفو فيا عبر الراديو و لا التيفي يحلو عينيهم مليح باه يسمعوني بيان , متغيروش التردد و متتحركوش من بلاصتكم .
أنا كيما الناس كل عارفة , رئيس و خلينا من الهدرة البايخة , رئيس مخلوع ... رئيس مخلوع و أنا و بلا كدب ماني مخلوع لهاد الدرجة قادر نصبر على الماكلة كيكل الناس , حتى في رمضان ناكل غير بعد أذان المغرب , و مانودش بكري يعني نصبح باه نسحر مي كاينا حاجة عييت نفهمها الأذان الثاني جامي سمعتو , يقولو راو كاين مي أنا مانيش مصدق و زيد هاد الشي ماهوش مذكور في الكتاب لاخضر فانا بصراحة منمنش بيه خلاص .

اليوم و للأسف مانيش راح نحيكلكم على خدمتي بارسك جامي خدمت في رمضان , ديما ندي كونجي في هاد الشهر الفضيل باه نتقرب إلى الله و هاد الشي راح تعرفوه من خلال الأشياء لينقوم بيها في هاد الشهر , بعد مانود و نتسحر و على فكرة ما زالي منمنش بالأذان الثاني ليحكيتلكم عليه غير قبيلة و قتلكم بلي مانمنش بيه خلاص و درك عاودتلكم الهدرة باه نقولكم بلي مازلت مانمنش بيه , بعد ما نسحر نشعل التيفي و ندير القناة الليبية و ليتوجور نتفرج البرامج ليفوتوهم باه نتطلع المورال على صباح ربي ... ليبيا الخضراء ... ليبيا بلاد السلام , ربي يخليها ليا , و الكل علابالو بلي بهاد القناة رانا نحاربو بيها الهدرة الزايدة , يقولو بلي القذافي راو يسكت الشعب نتاعو مي أنا حسب ماني شايف قاع الشعب رام يحكيو كبار و صغار , رجال و نسا , و واحد ما سكتهم , على العموم نرجعو للموضوع ليراح نحكيلكم فيه على شهر رمضان و كيفاه نفوتو , بعد مانتفرج نروح باه نشوف لا باج ديالي في الفيس بوك , مي ساعات نلقى هدرة فارغة و تحريف للأحاديث النبوية الشريفة كيما واحد قالك لا تلم ثلاثة : النائم حتى يستيقظ , الصغير حتى يكبر , و القذافي حتى يعقل !!! و لهذا أنا قررت مندخلش من داك اليوم للفيسبوك و الحمد لله من داك اليوم ليقررت فيه مندخلش للفيسبوك حتى ليوم هادا ليراني خبرتكم فيه بلي راني قررت من هداك اليوم بلي مانيش راح ندخل الفيسبوك مدخلتش خلاص , و إن شاء الله مندخلش خلاص للفيسبوك و باه تعرفوا بلي راني بديت مندخلش للفيسبوك من اليوم ليقررت فيه مندخلش للفيسبوك مرورا بهاد اليوم ليقتلكم فيه بلي راني قررت في هاداك اليوم بلي راني منزيدش ندخل الفيسبوك و نهاية عند اليوم لللل ... على العموم نقولو إن شاء الله .
و نختم اليوم الرمضاني بقيلولة و يكون الإستيقاظ قبل ربع ساعة من الأذان باه نفطر , أخيرا نقول لكل أم كانت ذكرا أو أنثى صح فطورك و لكل أب متزوج أو لم يسبق له أن تزوج صح فطورك نتا تاني .
كل الحقوق المرئية و السمعية محفوظة لإذاعة زنقة زنقة , و للملاحظة الفكرة مأخوذة من سي رمضان ليعندو حكاية طويلة مع شهر رمضان تشاهدونها على مدونة الفزاعة ... عفوا ميني موقع ماشي مدونة .